40% sang mga first town jeepneys pasudlon na sa Iloilo City sugod Mayo 31
ILOILO — Ginkasugtan sang Iloilo Provincial Government kag Iloilo City Government nga pasudlon ang 40% sang kabug-usan nga consolidated units sang kada ruta halin sa first towns ukon Oton, Leganes, kag Pavia umpisa Mayo 31.
Ini ang ginkumpirmar ni Provincial Planning and Development Office Head, Mario Nillos pagkatapos sang meeting nila nanday Iloilo City Traffic Management Unit (TMU) Head, Retired Colonel Uldarico Garbanzos, Provincial Administrator Dr. Raul Banias kag LTFRB Technical Head Engr. Joshua Gaquit.
Suno kay Nillos, nagsulat si Governor Arthur Defensor, Jr. kay Iloilo City Mayor Jerry Treñas nga nagahingyo nga pasugtan ang “at least 40%” sang units halin sa kada first town pasulod sa siyudad. Nabaton sang opisina sang alkalde sang Mayo 8 ang sulat kag gin-aprubahan sang Mayo 27.
“Ginklaro gid namon nga sa side sang province kag sa side sang city nga basically it’s 40% of the total consolidated units coming from the first towns, so ang 40% base na sa consolidated [units],” suno kay Nillos.
Pasudlon ang 40% sang mga first town jeepneys sa tion sang peak hours ukon las-6 sa aga tubtob las-9 sa aga kag las-4:30 sa hapon tubtob las-6:30 sa gab-i. Nabutang man sa sulat nga 25% lang sa kada ruta ang pasudlon sa oras sang off-pick ukon las-10 sa aga tubtob las-4 sa hapon.
“Take note [nga] may mga relative absolute figure sang numbers in terms of the PUJs so ang LTFRB provide[d] us with list of consolidated PUJs sa kada ruta. So meaning ang tanan nga ruta pakadto sa syudad from the first town, it’s 40% during the peak hours and 25% during the off pick,” dugang ni Nillos.
Ginkumpirmar man niya nga wala na sang ibutang nga mga buffer units ukon standby units sa kada terminal.
Base sa data sang PPDO, sa kada ruta mahimo nga makapasulod sang 94 sa 237 ka units sa Iloilo City-Leganes via Aquino Ave nga ruta; kag 23 sa 58 ka mga units sang Iloilo City-Leganes Via La Paz route.
Samtang, may 16 sa 41 ka mga units sang Iloilo City-Oton Derecho ang makadiretso sa syudad kag 49 sa 99 ka mga units sang Iloilo City -Oton-Anhawan.
Nagalab-ut naman sa 21 sa kabug-usan nga 53 ka mga units sang Pavia Via Aquino Avenue nga ruta ang makasulod sa syudad, kag 21 sa 52 ka units sang Pavia-Iloilo City via La Paz route. — via Aksyon Cedrick Anona