“Wala labot ang edad sa handum nga mag-eskwela” — Senior citizen nga Tribal Chieftain sa Tubungan nga nag-graduate sa senior high school sa edad nga 64

ILOILO — Wala sang mabutangan sang iya kalipay ang 64-anyos nga si Ledina Taguibe sang nag-graduate siya sa Senior High School sa idalum sang Alternative Learning System (ALS) program sa Tubungan National High School, kahapon.

Si Taguibe ang tumandok sang Brgy. Bato, Tubungan, Iloilo nga 11 ka tuig nga nangin barangay kapitan kag Tribal Chieftain sang Panay Bukidnon.

1972 sang nakatapos siya sa grade 6 apang wala na siya nakapadayon pa sa pag-eskwela tungod sa kapigaduhon.

Bisan wala nakatapos sa iya pagtuon, gintinguhaan naman ni Taguibe nga mapa-graduate ang iya tatlo ka kabataan nga subong lunsay mga propesyunal na. Duha sa iya kabataan ang nag-maestra samtang isa naman ang police.

Ginpabutyag ni Taguibe nga kuntento na siya nga nakatapos siya sa senior highs chool kag wala na sang plano pa nga mag-college tungod sa iya edad.

Ginpanugyan niya sa iya kapareho man nga mga senior citizens nga may handum pa nga mag-eskwela nga indi gid madulaan sang paglaum kag kalitan gid ang tiun kun may kahigayunan pa nga magtuon. — via Aksyon AM Reports