Mag-utod sa Alimodian pilason sang gintiro; suspek pilason man
ILOILO —Pilason ang mag-utod sang gintiro sa guwa sang ila balay sa Magallanes St., Poblacion, Alimodian pasado las-2:10 kaina sang kaagahon.
Ginkilala ang biktima nga lalaki kay Jigson Villanueva, 29-anyos, kag ang iya 19-anyos nga utod nga babaye amo si Jean.
Suspek si alyas Ryan, 40-anyos.
Suno kay Police Captain John Chrysler Ledesma, hepe sang Alimodian Municipal Police Station, may pagbinaisay nga natabo sa tunga sang suspek kag biktima nga lalaki antes natabo ang pagpangtiro.
Ginpahayag sang police nga nagasulod pa sa balay ang biktima kag nagkuha sang pusil. Sang nakabalik sa guwa sang balay, nabatian na ang mga lupok.
May pilas sa tuo nga porsyon sang paa si Jigson samtang naigo sa tiyan si Jean.
May na-recover sa crime scene nga lima ka empty shell sang ginapatihan basiyo sang 9mm nga pusil, suno sa police.
Gindala sa Aleosan District Hospital ang mga biktima pero ginsaylo sa ospital sa syudad.
Napilasan man ang suspek pero nakapalagyo kag padayon ginapangita, suno pa sa police. —via Paula Jane Elambayo
