9 nadakpan, P2.5 million nga balor sang suspected shabu na-recover sa buy bust sa Jaro
ILOILO CITY — Naglab-ut sa P2.5 million nga balor sang suspected shabu ang na-recover sang Regional Police Drug Enforcement Unit (RPDEU) sa grupo nga nadakpan sa drug bust operation sa gina-arkilahan nga balay sa subdivision sa Brgy. Tagbak, Jaro kaina sang kaagahon.
Ginkilala ni Police Captain Ryan Christ Inot, team leader sang RPDEU, ang main subject kag leader sang grupo kay alyas Panit nga ginakabig high value individual drug personality. May walo pa ka kaupdanan ang subject nga gindakop.
Suno kay Inot, tatlo na ka beses nga gin-test buy si alyas Panit pero kaina lang nadakpan tungod madasig makamutik sa operasyon kag nagasaylo-saylo sang ginateniran nga balay.
Ginbuyagyag ni Inot nga lunsay magpamilya ang nagabug-os sa grupo ni Panit nga ginbansagan nga “Desamparados Boys.”
Madasig ma-distribute sang grupo ang illegal items sa mga kabarangayan sa siyudad tungod kalabanan sa ila ang nagagamit sang motorsiklo sa tiun sang transaksyon, suno kay Inot.
Kinse (15) ka sachets sang suspected shabu ang na-recover sa operasyon nga nagabug-at sang 308 grams.
Detained sa Jaro Police station ang siyam ka mga nadakpan. —via Paula Jane Elambayo
