Masobra P900K nga balor sang suspected shabu na-recover sa drug buy bust sa Arevalo

ILOILO— Na-recover ang P986,000 nga balor sang suspected shabu sa tatlo ka indibidwal sa drug buy bust operation sa Brgy. Sooc, Arevalo sang Hunyo 26 sang gab-i.

Ginkilala ang mga nagkaladakpan kanday Alyas John, 24-anyos sang Jalandoni Wilson, City Proper; alyas Vanessa, 41-anyos sang San Jose, Arevalo; kag alyas Sony, 18-anyos sang Sto. Domingo, Arevalo.

Suno kay Police Captain Glenn Soliman, Office-In-Charge sang Regional Police Drug Enforcement Unit 6, nagkilalahay ang tatlo paagi sa ila man nga kakilala sa presuhan.

Na-recover ang 145 grams sang suspected shabu sa operasyon, suno sa police.

Sa pagpangusisa sang police, si Sony kag Vanessa ang naga-uyat sang supply sang illegal drugs kag nagabulig lang si John sa pag-distribute sa syudad.

May contact sa sulod sang presuhan ang tatlo kag “ginadagdag” lang sang source nila sa isa ka lugar agud i-pick up, suno sa police.

Nakaagi na preso sa kaso may kaangtanan sa illegal drugs si Vanessa samtang theft naman ang kaso sadto ni John.

Nagapadayon ang pag-imbestigar kag monitoring sang police sa koneksyon pa gid sang tatlo. — via Aksyon Farrah Mae Morano