Bangkay sang lalaki nga wala na sang brief kag may pilas sa lawas nasapwan sa Lambunao

ILOILO — Nasapwan sang mga residente ang lalaki nga wala na sang ginasuksok nga brief kag may pilas sa lawas sa Poblacion Ilawod, Lambunao subong nga aga.

Suno kay Major Roy Tayona, hepe sang Lambunao Municipal Police Station, nalabayan lang sang residente ang lalaki nga nagahuray-ad sa kilid sang dalan.

Gin-identify naman sang iya iloy ang lalaki kay Geyppe Lego, 27-anyos, contruction worker kag taga-Bagongbong, Lambunao.

Sa initial nga imbestigasyon sang Lambunao police, pasado las-4 kahapon sang hapon, Hunyo 29 sang ginhagad si Lego sang iya pakaisa nga magpauli tungod sweldo nila.

Antes magpauli, naghagaray pa sila upod ang tatlo pa ka lalaki nga mag-inum inom sa barracks nga gina-obrahan nila.

Mga las-5 sang hapon sang nagpauli ang pakaisa ni Lego upod ang duha ka kaupdanan pero nagpabilin ang biktima kag ang isa pa construction worker.

Subong lang nga aga, nahibaluan sang mga himata ang natabo sa lalaki.

Sa inisyal nga imbestigasyon, pilas sang pagkabuno sa wala nga porsyon sang tiyan kag sa likod ang naagum ni Lego.

Padayon pa nga gina-imbestigaran kun ano gid ang matuod nga natabo sa biktima. — via Aksyon Farrah Mae Morano/Paula Elambayo