Mga suspek sa pagpanghold up sa siyudad kag probinsya sang Iloilo palareho ang modus — ICPO
ILOILO– Palareho ang modus sang mga suspek sang asud-asud nga pagpanghold-up sa probinsya kag syudad.
Ini suno kay Iloilo City Police Office Director Police Colonel Joeresty Coronica sang nakig-angut siya sa Iloilo Police Provincial Office.
Ginpahayag niya nga lunsay riding-in-tandem ang mga suspek nga gin-report sa ila, may dala nga pusil kag naga-target sang bisan sin-o nga malabayan nila nga nagaguwa kun kaagahon ilabe na ang mga nagatrabaho.
Una nga gin-report ang hold-up incident sa call center agents sa Pavia kag Oton sang Hunyo 24 sang kaagahon. Samtang nagreklamo man sa Aksyon Radyo Iloilo ang isa pa ka call center agent nga gin-hold up siya sa amo man nga adlaw sa Mandurriao.
Tungod sini, mas hugot pa gid nga bantayan sang kapulisan sang ICPO ang syudad kag ipahibalo sa komunidad ang mga dapat ubrahon agud malikawan ang kasubong nga insidente.
Ginpabutygag ni Colonel Coronica nga imbestigaran nila ang natabo nga hold-up incident sa Mandurriao agud makilala ang mga suspek. I-check man nila sa mga biktima ang nahawidan nila nga decription sang mga suspek nga posible may record naman sa pulis. — via Aksyon Firingline
