Driver sang delivery truck na-aktuhan sang tag-iya sang establisyemento nga napangawat sang grocery items sa City Proper

ILOILO CITY — Wala na nakapalagyo ang 26-anyos nga lalaki sang na-aktuhan sang tag-iya nga nagapangawat sa gina-obrahan nga establisiyemento sa City Proper kagab-i, Hulyo 16.

Ginkilala ang suspek kay alyas Dondon nga taga-Veterans Village kag naga-obra nga driver sang delivery truck sa establisiyemento.

Suno kay Police Captain Joebert Amado, officer-in-charge sang Police Station 7, madugay na nagaduda ang tag-iya sang establisiyemento sa aktibidad sang suspek.

Kagab-i, nagbalik sila sa establisiyemento kag nakit-an ang suspek sa sulod sang warehouse gani nagtawag sang police.

Ginpahayag sang police nga ginsiraduhan pa sang suspek ang warehouse sang nakita ang tag-iya kag kapulisan.

Sa imbestigasyon sang police, wala nagapuli pagkatapos sang iya duty ang suspek kag nagatenir sa warehouse agud mangawat sang kinarton nga grocery items nga ginabutang niya sa delivery truck.

Pasakaan sang kaso nga attempted qualified theft ang suspek suno sa police.

Detained sa custodial facility sang Police Station 7 ang suspek. — via Aksyon Paula Elambayo