Top spot sa rice producing area handum nga mabawi sang Iloilo province sa bulig sang JRMP II
ILOILO — Luyag nga bawion sang probinsiya sang Iloilo ang top spot sa rice production sa bilog nga pungsod.
Ini ang ginpahayag ni Iloilo Governor Arthur Defensor, Jr.
Suno sa gobernador, mahimo na nga malab-ot ang handum sa bulig sang Jalaur River Multi-Purpose project (JRMP) stage II.
Dugang pa sang gobernador nga Pototan ang number one rice producing municipality sa Iloilo kag luyag niya nga mangin major contributor ang probinsiya sa food security sang pungsod.
“We want to gain the top spot. [Do] you know why? Several years ago, Iloilo [was] number one rice-producing area. Pototan was the number one rice-producing municipality and we want to regain that,” pahayag pa ni Defensor.
Daku naman ang mabulig sang JRMP II sa probinsiya ilabe na gid sa rice hybrid program sa diin target sang provincial government nga madugangan sang 6 tons kada ektara ang rice production.
Pananglitan malab-ot sang provincial government ang target, mangin dako ang kontribusyon sang Iloilo sa food security sang Pilipinas kag sa administrasyon ni President Ferdinand Marcos, Jr.
Magluwas sa mga mangunguma, linibo man ka mga pumuluyo sa Iloilo City kag probinsiya ang makabenepisyo sa JRMP ilabe na nga ang porsyon sang tubig ang pagagamiton bilang supply.
Indi naman luyag ni Defensor nga masalig ang probinsiya sa mga imported nga bugas rason nga naghimakas ang pila ka mga Ilonggo officials nga mapasar kag mangin madinalag-on ang JRMP II.
Kaina sang aga, ginpangunahan ni President Ferdinand Marcos, Jr. ang inauguration sang JRMP II kaupod kanday DA Secretary Francisco Tiu Laurel, Jr., National Irrigation Administration (NIA) Administrator Eduardo Eddie Guillen.
Yara na sa 75.51% ang physical accomplishment sang JRMP II sa diin nakumpleto na ang tatlo ka mga dalagko nga dams — Jalaur High dam, After Bay kag Alibunan catchment dam. — via Aksyon Cedrick Anona
