Rumble strips ginbutang sa national highway sa Buyuan, Tigbauan tungod sa sunod-sunod nga vehicular accidents

TIGBAUAN, ILOILO–Ginbutangan sang transverse rumble strips ang national highway nga sakop sang Buyuan, Tigbauan nga ginhalinan sang madamo nga disgrasya subong nga tuig.

Ang transverse rumble strips isa ka alert-warning traffic system nga ginabutang sa dalan nga nagapa-alerto sa mga drivers agud maghinay-hinay ilabi na sa mga madanlog kag porsyon sang dalan nga malapit sa pedestrian lane.

Sa social media post ni Punong Barangay Warren Briones, Department of Public Works and Highways (DPWH) ang nagbutang sang rumble strips.

Una na ginpabutyag ni Briones nga sa subong lang nga tuig, indi magnubo sa 100 ka disgrasya ang na-record sa amo nga dalan.

Suno kay Briones, nag-umpisa nga nagdamo ang nagakadisgrasya sa amo nga dalan sang gin-obra ini sang DPWH.

Sang Hulyo 19, nadisgrasya sa amo nga dalan ang pribado nga salakyan kag nagtiyog tungod sa impact. Sang Hulyo 18 naman, nawasak ang unahan nga porsyon sang van sang nakabunggo sa pader sang tiyangge nga nahamtang sa amo man nga dalan.