10 ka coastal barangays sa siyudad sang Iloilo nagpatuman sang preemptive evacuation tungod sa mamadlos nga hangin kag dalagku nga balod
Nagpatuman sang preemptive evacuation ang 10 ka mga coastal barangays sa siyudad tungod sang mamadlos nga hangin kag dalagku nga mga balod kahapon, Hulyo 21.
Base sa Executive Order 104 ni Iloilo City Mayor Jerry Treñas, ang 10 ka mga barangay amo ang Boulevard, San Juan kag Calumpang sa Molo; Sto. Niño Norte, Sto. Niño Sur kag Calaparan sa Arevalo; kag Ortiz, Gen. Hughes, Rizal Ibarra kag Maria Clara sa City Proper.
56 ka mga pamilya ang apektado kag 61 ang nagkalaguba nga mga balay base sa record sang siyudad kahapon.
Ginamanduan ang taga-City Social Welfare and Development Office (CSWDO) kaupod ang DSWD nga managtag sang food packs sa mga apektado nga pamilya.
Ginpahibalo man sang alkalde nga hatagan sang financial assistance ang mga apektado nga pamilya. — via Aksyon Justice Savannah Pamplona
