35 ka balay nga naga-istar sa higad sang baybay sa Iloilo City naguba sang mamadlos nga hangin kag dalagku nga balod
ILOILO CITY – Nagpatuman sang preemptive evacuation ang Iloilo City Government sa pila ka mga residente nga naga-istar sa higad sang baybay tungod sa mabaskog nga hangin kag balod.
Suno kay Local Disaster Risk Reduction and Management Officer IV Darwin Papa, ginakahangaw-an nila ang pagdungan sang mabaskog nga hangin, balod kag taob nga makahalit sa mga pumuluyo sa coastal barangays.
Sa latest data sang City Disaster Risk Reduction and Management Office (CDRRMO), 35 na ka mga balay sa siyudad ang nagkalaguba. Sa amo nga numero, 17 ang nawasak gid, kag 18 ang partially damaged tungod sa dalagku nga balod.
Sa mga naguba nga balay, 29 ang na-record sa Brgy. Boulevard, Molo; apat sa Ma. Clara, City Proper; kag tag-isa sa San Juan, Molo, kag Ortiz, City Proper. Temporaryo nga nagatiner sa evacuation centers sang tagsa ka mga barangay ang apektado nga mga pumuluyo.
Ginpasugtan naman sang CDRRMO ang mga lalaki nga miyembro sang pamilya nga balikan ang ila balay kun may gusto sila nga himuson samtang magapabilin sa evacuation centers ukon magtiner sa ila himata ang mga babaye kag kabataan agud madasig nga maka-evacuate kun liwat nga magtaas ang level sang tubig.
Una na nga gin-report sang PAGASA- Iloilo nga dala sang pagbaskog sang hangin Habagat ang na-experiensiyahan nga mamadlos nga hangin kag dalagku nga mga balod ilabe na sa isla sang Panay.
