Foam nga na-asikan sang welding slags ginhalinan sang sunog sa building sang WVSUMC Dorm
ILOILO CITY — Nag-umpisa sa foam nga posible na-asikan sang welding slags ang ginalantaw nga rason sang sunog sa rooftop sang West Visayas State University Medical Center dormitory las-10:16 kahapon sang aga.
Suno kay Fire Officer 2 John Paquito Verano, imbestigador sang Iloilo City Fire Station, antes nagluntad ang sunog may naga-welding sa rooftop tungod ginakay-o ang atop.
Nahamtang sa amo nga area ang mga foam kag tela tungod masaylo ang Linen Department sang ospital. Gina-construct na lang ang atop agud makasaylo na ang mga personnel sa amo nga area, suno kay Verano.
Posible nasunog ang foam kag naglaton lang ang kalayo sa iban nga parte sang building.
Sa subong, gina-take over sang Regional Office ang imbestigasyon sa nasunog nga istruktura tungod ginapanag-iyahan sang gobyerno.
Nagbilin sang P27,000 nga balor sang kahalitan ang sunog.
Gindeklarar nga fire out las-10:37 sa aga. — via Aksyon Farrah Mae Morano
