Baligyaan sang motorsiklo nasunog sa Dulonan, Arevalo

ILOILO CITY — Naulamid ang mga dokumento nga nabutang sa stockroom sang baligyaan sang motorsiklo sa Brgy. Dulonan, Arevalo sang nagluntad ang sunog kagab-i, Agosto 1.

Suno kay Fire Officer 2 John Paquito Verano sang Iloilo City Fire Station, nalakip man sa sunog ang porsyon sang lamesa, CPU sang computer nga guba na, keyboard kag iban pa nga mga gamit.

Sa subong, gina-imbestigaran pa ang ginhalinan sang sunog.

Una na nga ginpabutyag sang tag-iya sang building nga naga-istar sa 2nd floor nga nanotisyaran lang nila nga may naga-aso tubtob nabatian ang fire alarm sang baligyaan nga nahamtang sa ground floor.

Gina-imbestigaran pa sang BFP- Iloilo City ang insidente. — via Aksyon Farrah Mae Morano