“It’s always time for Jed [Patrick Mabilog] to come back and clear his name” — Iloilo City Mayor Jerry Treñas
Dapat nga magpauli sa Pilipinas si former Iloilo City Mayor Jed Patrick Mabilog agud klaruhon ang iya pangalan may kaangtanan sa pagkadalahig sa iya sa illegal drug trade.
Ini ang ginpahayag ni Mayor Jerry Treñas makaligad nagtuhaw ang ngalan sang anay alkalde sa hearing sang quad-committee sang House of Representatives sang nagligad nga semana.
Ang quad-committee nga ginabug-usan sang Committees on dangerous drugs, public order and safety, human rights, kag public accounts ang naga-imbestigar sa mga criminal activities nga may koneksyon sa Philippine Offshore Gaming Operator (POGO), lakip na ang illegal drug trade kag ang ginpahayag extra-judicial killings sa anti-drug campaign sang Duterte administration.
Suno sa alkalde, kinahanglan na nga magpauli ni Mabilog, indi para kay Iloilo City Lone District Rep. Julienne “Jam-Jam” Baronda kundi para sa iya kaugalingon.
Sa amo nga hearing, ginpabutyag ni Rep. Baronda nga luyag niya panason ang bansag sa siyudad nga “most shabulized city” sa pungsod.
Madumduman nga si former President Rodrigo Duterte ang nagtawag sa Iloilo City nga “most shabulized city” tungod sang madata nga illegal drug trades kag presensya sadtu sang mga PDEA-identified drug lords.
Nagapati si Congresswoman Baronda nga na-misinform lang ang anay pangulo gani nagapangayo siya sang pamatuod halin sa mga law enforcement agencies agud mahatagan sang hustisya ang siyudad.
Nagapangayo man siya sa PNP kag PDEA sang listahan sang mga pulitiko nga involved sa illegal drug trade sang 2017 agud mauntat na ang mga alegasyon batok kay former Mayor Mabilog nga nakabaton sang mga pamahog tungod sa iya involvement sa narcotics trade.
Handa si Congresswoman Baronda nga imbitaron ang anay alkalde agud magtambong sa committee hearing kag klaruhon ang iya ngalan.
