Iloilo province ginpaidalom sa state of calamity tungod sa dengue outbreak
Gin-aprubahan sang Sangguniang Panlalawigan ang rekomendasyon sang Provincial Disaster Risk Reduction and Management Council nga ipaidalom ang Iloilo sa state of calamity tungod sa dengue outbtreak.
Base sa data nga ginpresentar sang Provincial Health Office as of August 17, nagalab-ut na sa 5,836 ang kaso sang dengue sa bug-os nga probinsya nga may 12 na ka napatay subong nga tuig.
Ang pagdeklarar sang Iloilo provincial board sang state of calamity tungod sa dengue outbreak | August 20, 2024
Lakip sa mga ginpangayo sang PDRRMC ang P13.6 million nga budget para gamiton sang PHO kag mga ospital sa probinsya sa pagbakal sang nagkalain-lain nga kinahanglan para mabatuan ang balatian.
Ginpahayag naman ni PHO Head, Dr. Maria Socorro Quiñon nga nagakaangay nga ibutang sa state of calamity ang probinsiya agud mabuligan sang nagkalain-lain nga ahensya sang gobyerno ang pagtapna sa dengue.
Una na nga ginpahayag ni Quiñon nga base sa assessment sang mga sanitary inspectors, kalabanan nga “breeding sites” sang lamok ang basura, barado nga kanal, drums kag balde nga may gin-istaka nga tubig nga wala natabunan, goma nga nasudlan sang tubig kag nabuka nga botelya nga nagakaya. —via Cedrick Anona
