5 lakip ang job hire sa Iloilo City Hall dakop sa drug buy bust operation sa Jaro

ILOILO CITY — Nadakpan sa operasyon ang lima ka indibidwal lakip ang job hire sa Iloilo City Hall sa drug buy bust operation sa Brgy. Our Lady of Fatima, Jaro kagab-i, Setyembre 5.

Ginkilala ang mga nagkaladakpan kanday Henry Cordova, 57-anyos sang Brgy Caingin, La Paz; Jermeine James Roxas, 47-anyos sang Brgy San Nicolas, La Paz; kag Chad Vincent Aroda, 34-anyos, nga job hire sa City Hall kag residente sang Brgy Ticud, La Paz.

Gindakop man ang magnobyo nga Nikki Vista, 25-anyos sang San Jose, Antique, kag Rey Laurence Laurea, 35-anyos sang Brgy. Alta Tierra, Jaro nga mabakal kun tani sang illegal drugs, suno sa police.

Ginpabutyag ni Lt. Joelie John Bandojo, team leader sang City Drug Enforcement Unit (CDEU), na-monitor ang illegal activities sa lugar tungod sa mga impormasyon nga nabaton nila halin sa pumuluyo.

Na-recover ang 55 grams sang suspected shabu nga may standard drug price nga P374,000.

Ginahibalo pa sang police ang ginakuhaan sang supply sang illegal drugs sang nagkaladakpan. — via Aksyon Farrah Mae Morano