Mag-utod pilason sa shooting incident sa East Baluarte, Molo

ILOILO CITY — Pilason ang mag-utod sa shooting incident sa East Baluarte, Molo kagab-i, Setyembre 9.

Ginkilala ang mag-utod kanday Jessie Nacase, ginabanta 37-anyos, kag iya magulang nga si Julius, 41-anyos.

Suno kay Punong Barangay John Gary Patnubay, nagsungka sa iya ang suspect nga si Larry Sumbang kag nagpabutyag nga nahaboy niya ang caliber 22 niya nga pusil tungod sa kakulba.

Dugang pa ni Patnubay, nag-umpisa ang indi pag-intiendihanay sang pamilya sang mga biktima kag suspect sang Sabado sang kaagahon sa diin una nga nakabais ni Sumbang ang hinablos sang mga biktima nga si Rodmar Nacase.

Suno naman sa utod sang mga biktima kag iloy ni Rodmar nga si Jenilyn, halin sang nag-baisay ang iya hinablos kag suspect, ginhambalan sang suspect ang iya mga utod nga kanday Jessie kag Julius nga indi magpakita sa iya si Rodmar kag ginpamahog ang ila pamilya.

Sa panaysayon naman sang suspect, ginpahayag ni Punong Barangay Patnubay nga ginpulihan siya sang mga biktima kag ginbuno sang isa sa ila rason nga natiruhan niya sila nga duha.

Una na ini nga gin-report sa barangay kag natalana kuntani nga mag-atubangay ang duha ka bahin.

Lima ka lupok sang pusil nga nabatian ang mga residente tubtob nakita nga pilason na ang mag-utod.

Padayon pa nga ginabulong sa ospital ang mag-utod nga unconscious gihapon. — via Aksyon Paula Elambayo