2 pilason sang gintiro sang riding-in-tandem suspects sa Zarraga
ILOILO— Pilason ang driver sang tricycle kag sakay niya nga helper sang gintiro sang riding-in-tandem suspects sa Ilaya Poblacion, Zarraga las-7 kagab-i, Setyembre 17.
Suno kag Police Captain Zharra Dela Rosa, OIC sang Zarraga Municipal Police Station, ginkilala ang driver nga napilasan kay Noel Madera, 42-anyos sang Barangay Pasil, New Lucena; kag ang helper nga si Jake Susal, 25-anyos.
Wala naman napilasan ang bayaw ni Noel nga si Christine.
Sa impormasyon nga nakalab-ut kay Brgy. Ilaya Poblacion Punong Barangay Jasper Garde, halin sa ila nga store sa merkado ang tatlo ka sakay sang tricycle kag papuli na kun tani sang may nagtupad sa ila nga motorsiklo nga may duha ka sakay pag-abut sa Confessor Street.
Sa pagpangusisa ni Garde, nagbaisay pa ang mga suspek kag ang sakay sang tricycle tubtob natabo ang pagpangtiro.
Sa initial nga impormasyon sang police, nagdeklarar nga hold-up ang mga suspek pero indi pa nila madetalye ang natabo kag kun amo ini ang tuyo sang mga suspek.
Napilasan ang driver sang tricycle kag iya nga helper gani ginhingagaw dala sa ospital.
Padayon pa nga gina-imbestigaran sang police ang insidente. — via Aksyon Farrah Mae Morano
