Lalaki nga nagatabok sa karsada patay sang nabungguan sang bus sa Dueñas

ILOILO— Patay ang 45-anyos nga lalaki sang nabungguan sang Ceres bus sa Poblacion A, Dueñas Domingo sang gab-i, Setyembre 30.

Suno kay Police Captain Jesus Batilanti Jr, hepe sang Dueñas Municipal Police Station, halin sa Roxas City kag pakadto sa Iloilo City ang bus nga may walo ka pasahero.

Sa imbestigasyon, nagtabok sa karsada ang biktima sang nabungguan sang bus gani nakaagum sang patal nga pilas sa ulo.

Fiesta sa banwa sang Dueñas kahapon kag naka-inum ang biktima, suno sa police.

Ginpabutyag naman sang driver sang bus nga malayo pa lang, nagapangbusina na siya ilabe na nga madulom ang lugar pero nalab-ut gid ang biktima.

Pagkatapos sang insidente, nag-surrender man ang driver sa police.

Ginhingagaw pa dala sa ospital ang biktima pero gindeklarar nga dead-on-arrival. — via Aksyon Farrah Mae Morano