Food poisoning incident sa Guimaras State University gina-imbestigaran na sang school administration
Gina-imbestigaran na sang Guimaras State University ang gin-report nga insidente sang food poisoning sa unibersidad sang weekend.
Sa statement nga ginpaguwa sang GSU, ginpahayag sang unibersidad nga ma-imbestigar sila agud makahimo sang istrikto nga polisa kag guidelines, ilabe na sa preparasyon kag pagdumala sang pagkaon sa school events agud malikawan ang kapareho ga insidente.
Gindugang sa statement nga paagi sini, mapamatud-an ang commitment sang unibersidad sa health, safety kag well-being sang mga estudyante.
Una na nga gin-report nga madamo ang naglain ang pamatyag makaligad nagkaon sang spaghetti sa conference nga gintambungan.
Sa subong, nagpatuman ang GSU sang mga measures pareho sang pagbukas sang University Clinic sang 24 oras kag paghatag sang libre nga bulong kag oral rehydration solutions sa mga na-apektuhan.
Naghatag man ang unibersidad sang financial assistance sa mga pasyente nga indi makasarang magbayad sang laboratories kag prescribed medicines kag nagpangayo man sang assistance ang GSU sa local government officials kag rural health unit.
Ginpasiguro sang unibersidad sa mga apektado nga estudyante nga hatagan sila sang refund, base sa mutual benefit fund magluwas pa sa commitment ni Cong. Ma. Lucille Nava nga bayaran ang hospital bill sa tiun sang consultation kag confinement paagi sa congressional fund.
Sa data sang GSU, 19 pa ka indibidwal ang nagapabilin nga admitted sa ospital tungod sa food poisoning.
