Ceres bus nga padulong sa Tapaz, Capiz nasunog sa Cabatuan

ILOILO — Wala sang napilasan nga pasahero sang nasunog ang Ceres bus sa Barangay Tabucan, Cabatuan kagab-i, Nobyembre 24.

Suno kay Ms. Jade Marquez, media relations officer sang Vallacar Transit Inc., nakaguwa tanan nga pasahero antes pa man nagkalayo ang bus.

Dugang niya may nagkadto nga maintenance team agud i-check kun ano ang guba sang unit nga gintunaan sang kalayo.

Sa panaysayon sang driver sang bus, ginpabutyag ni FO3 Daryl Talamera, imbestigador sang Cabatuan Municipal Fire Station nga nakita niya nga may nagaaso sa driver’s side.

May naga-motorsiklo nga nag-overtake sa bus kag ginhambalan niya ang driver sang bus nga may nagakalayo na sa dalom sang salakyan.

Base naman sa nakakita, una nga nag-aso ang atubang sang bus kag gilayon nga ginpapanaug ang mga pasahero. Sang naubos na nga nakapanaug ang mga pasahero, sunod nga nag-ibwal ang kalayo.

Nalab-ut sang kalayo ang linya sang kuryente kag telco suno sa mga residente.

Padayon nga gina-imbestigaran sang mga bumbero ang ginhalinan sang sunog. — via Aksyon Maria Kayla Tingzon