Solterito gintuyo nga tiruhon ang nagabantay sang tiyangge sa Estancia tungod wala siya ginbaligyaan sang sigarilyo

ILOILO– Masuwerte nga wala naglupok ang pusil nga dala sang solterito sang gintiro ang nagabantay sang tiyangge sa Purok-6 Brgy. Botongon, Estancia tungod wala siya ginbaligyaan sang sigarilyo sang Nobyembre 25 sang gab-i.

Suno kay Police Master Sergeant Dan Jerald Allanic, imbestigador sang Estancia Municipal Police Station, antes ang insidente nagbakal sang sigarilyo si alyas Toto, 17-anyos pero wala siya ginhatagan sang biktima nga si alyas Freddie, 65-anyos tungod menor-de-edad pa siya.

Sa pihak sini, nagpamilit si Toto nga hatagan siya ni Freddie sang sigarilyo tubtob nagbaisay sila. Sang nagguwa si Freddie sa tyangge, naggabot sang homemade shotgun si Toto kag gintiro ang biktima pero wala naglupok ang pusil.

Ginlagas sang mga nagatambay sa tyangge ang solterito nga nagdalagan padulong sa madulom nga kawayanan.

Nag-surrender sa barangay kaina sang aga ang solterito kag natalana i-turnover sa Municipal Social Welfare and Development Office sa Estancia. — via ARI Trainee reporter Ivan Villa