JR Castro nga suspek sa pagpatay kay former Kapitan Joevannie Triste nag-surrender sa Tigbauan police
Nag-surrender sa Tigbauan Municipal Police Station si JR Castro nga suspect sa pagpatay kay anay San Rafael, Tigbauan Punong Barangay Joevannie Triste, pasado ala-1 kaina sang kaagahon.
Ini ang gin-aku ni Castro antes pa man siya gin-serbihan sang warrant of arrest.
Suno kay Castro, may nagpahibalo sa iya nga nakaguwa na ang warrant of arrest sa kaso nga murder batok sa iya kagab-i rason nga nag-contact siya sa Tigbauan Police.
Si Police Captain Alfred Mansoy, officer-in-charge sang Tigbauan MPS ang gintawgan ni Castro sa iya pag-surrender.
Ginkadtuan sang Tigbauan police sa iya safe house sa Brgy. Bagumbayan si Castro kag gindala sa police station.
May suksok nga bulletproof vest si Castro sang nag-abot sa police station para sa iya seguridad.
Ginpabutyag ni Castro nga nag-surrender siya tungod handa siya atubangon ang kaso nga ginpasaka sa iya sa pagpatay kay former San Rafael, Tigbauan Punong Barangay Joevannie Triste.
Detained sa Tigbauan police station si Castro.
