Driver sang motorsiklo patay sang nakabunggo sa gutter sa Miagao

ILOILO— Nalampos ang ulo sa semento sang driver sang motorsiklo sang nakabunggo sa gutter sa Zulueta Avenue, Brgy. Bolho, Miagao pasado la-una kaina sang kaagahon.

Suno kay Police Major Richard Lao, hepe sang Miagao Municipal Police Station, halin sa banwa sang Miagao kag papuli na kuntani sa Brgy. Palaca si alyas Jesmar, 32-anyos sang natabo ang aksidente.

Base sa pagpangusisa sang kapulisan, nag-overshoot sa pihak nga linya ang motorsiklo sa kurbadahon nga dalan kag nakabunggo sa gutter rason nga nagtabog kag nalampos ang ulo sa semento.

Wala sang suksok nga helmet kag madasig ang pagpadalagan sang driver, suno sa police.

Naka-inom sang makahulubog nga ilimnon ang driver, suno pa sa police.

Naka-agum sang pilas sa wala nga tiil kag pilas sa ulo ang driver sang motorsiklo.

Gindala sa Miagao Rural Health Unit si Jesmar kag gin-transfer sa Guimbal District Hospital apang napatay samtang ginabulong. — Aksyon Farrah Mae Morano