Magpamilya nakuhaan sang P1 million nga balor sang suspected shabu sa drug buy bust sa Molo
ILOILO CITY — Dakop ang magpamilya sa drug buy bust operation sa Barangay Calumpang, Molo mga las-6 kagab-i, Disyembre 25.
Ginkilala ang mga nagkaladakpan kanday alyas Kulit, 59-anyos, iya asawa nga si alyas Inday, 56-anyos, bata nila nga sanday alyas Caloy, 21-anyos kag alyas Nene nga 17-anyos.
Suno kay Police Captain Ryan Christ Inot, officer in charge sang Molo Police Station, makapila ka beses na nga ginasaway sang mga barangay officials kag pumuluyo sa lugar ang amo pamilya tungod sa pagbaligya sang illegal nga druga.
Ginpabutyag man ni Inot nga una na nadakpan sang Agosto subong nga tuig ang isa pa ka bata ni alyas Kulit nga nakuhaan sang ginabanta P2 million nga balor sang illegal nga druga.
Dugang niya nga ang amo nga bata nga preso sa New Bilibid Prison sa Muntinlupa ang ginakuhaan sang supply sang illegal nga druga sang mag-asawa.
Sa monitoring sang police, mga taga-Molo, Arevalo kag City Proper ang nagabakal sang illegal nga druga sa mga subject.
Na-recover ang 10 ka sachets kag duha ka dalagku nga pinutos sang suspected shabu nga ginabanta nagabug-at sang 150 grams kag may estimated value nga P1,020,000. — Aksyon Maria Kayla Tingzon
