SUV nakabunggo sa poste sang teleco, poste sang street light sa City Proper; Driver may ginlikawan nga motorsiklo antes na-aksidente suno sa pulis

ILOILO– May ginlikawan nga motorsiklo ang SUV rason nga nakabunggo sa poste sang Telecommunications kag poste sang street light sa JM Basa St., City Proper pasado la-una kahapon sang kaagahon, Disyembre 25.

Suno kay Police Chief Master Sergeant Edward Barrida, imbestigador sang Traffic Enforcement Unit, halin sa JM Basa St. kag padulong kun tani sa General Hughes ang 27-anyos nga driver sang SUV.

Sa imbestigasyon sang police, ginlikawan sang SUV ang motorsiklo nga nag-overtake kag nagbalabag sa iya, rason nga nawahig pa-tuo ang manibela kag nabungguan ang steel post sang warning device sa kilid sang karsada, nagsaka sa gutter kag nabungguan ang poste sang telco kag isa pa gid ka poste sang street light.

Na-utod ang poste kag natumbahan ang ibabaw sang SUV. Nawasak ang unahan nga porsyon sang SUV.

Sa pagpangusisa sang police, madasig ang pagpadalagan sang driver sang salakyan.

Gindala sa ospital ang driver tungod may pilas sa ilong kag tuo nga kamot. — ARI Trainee reporter Ivan John Villa