Canlaon City LGU nagapanghanda kun ipasaka sa Alert Level 4 ang status sang Bulkan Kanlaon

NEGROS ORIENTAL — Indi mapaktan ang mga aktibidad sa Bulkan Kanlaon gani sige-sige ang preparasyon sang local government unit sang Canlaon City para sa worst-case scenario.

Paathag ni Mariton Antonia Bornas, chief sang Volcano Monitoring and Eruption Prediction Division sang Philippine Institute of Volcanology and Seismology (PHIVOLCS), padayon nga nagapakita ang bulkan sang heightened activity pareho sang pagbuga sang abo halin sang naglupok sang Disyembre 9, 2024.

Tungod sini, ginapahanda ang Canlaon City pananglitan ipasaka sa Alert Level 4 halin sa Alerto Level 3 subong ang status sang bulkan.

Kun ideklarar ang Alert Level 4, nagakahulugan ini sang daku nga posibilidad sang magmatic nga paglupok nga tuman ka delikado.

Sa Alert Level 4, i-evacuate ang tanan nga residente sa sulod sang 14 kilometro halin sa bulkan.

Suno kay Canlaon City Mayor Jose Chubasco Cardenas, ang bilog nga Canlaon City ang 11.5 kilometers ang distansya halin sa baba sang Kanlaon gani i-evacuate ang tanan nga residente sang siyudad kun ipasaka ang Alert Level 4.

May ginahanda na ang siyudad nga Plan EXODUS (Oplan Exit Operations During Uncertainties Strategy) sa diin isaylo ang tanan nga malapit 60,000 ka residente sang Canlaon City sa designated evacuation centers sa Vallehermoso kag Ayungon, Negros Oriental nga kaiping sang siyudad.