Iloilo Sunset Boulevard i-turnover sang DPWH 6 sa Iloilo City Gov’t

I-turn over na sang Department of Public Works and Highways 6 ang pagdumala sang Iloilo Sunset Boulevard sa Iloilo City Government subong nga adlaw.

Ini sang ginhingyu ni Mayor Jerry Treñas nga padasigon ang pag-turn-over sang proyekto sa siyudad agud mahimuan sang nagakaigo nga mga pagsulundan para sa mga nagapadulong sa lugar.

Ini may kaangtanan sa tinumpok kag nagalinapta nga basura nga makit-an sa mga dalanon sang Sunset Boulevard kun kaagahon nga ginabilin sang mga naga-park-shot ukon naga-inum-inom sa lugar.

Kun masaylo na sa siyudad ang jurisdiction sa pag-maintain sang lugar, mabutang sang mga basurahan, maplastar sang mga pulungkuan, kag mahimo sang mga ordinansa ang siyudad sa pagpabilin sang kalimpyo kag kalinong sa lugar.

Nakalab-ot man kay Mayor Treñas ang reklamo sang mga unit owners sang mga condominiums malapit sa lugar sa gahod nga nagahalin sa Sunset Boulevard ilabi na kun kaagahon, kag ang report sang General Services Office angut sa mga basura nga ginabilin sa esplanade walkway. — Aksyon Marvin Malificiar