Senior citizen patay sang ginlabo sa Janiuay; suspek nag-surrender

ILOILO— Preso na sa Janiuay Municipal Police Station ang suspek nga naglabo sa 67-anyos nga lalaki sa Barangay Quipot, Janiuay kagab-i.

Ginkilala ang biktima kay Jeffrey Rapista, residente sang amo man nga barangay. Suspek sa krimen si Tangloy Roche, 51-anyos.

Suno kay Police Captain Hector Ayagan, hepe sang Janiuay Municipal Police Station, upod nga nag-inum-inum ang suspek, ang biktima kag ang duha nila ka mga abyan halin las-9 sa aga.

Sa pagpangusisa sang police, ginsumbag sang biktima ang suspek tungod sang kahulugbon pero napukas sila.

Mga las-6 sa gab-i, nagpauli ang biktima agud magtulog pero ginsundan sang suspek sa ila balay nga may sukbit nga binangon, suno sa police.

Nagpanuktok pa ang suspek sa balay sang biktima kag ginbuksan sang asawa, suno sa police. Sang nakita sang suspek nga nagahigda ang biktima sa sala ginpalapitan niya kag ginlabo sa liug.

Ginhingagaw pa dala sa ospital ang biktima pero gindeklarar nga dead-on-arrival.

Nagpalagyo pa ang suspek pagkatapos sang krimen pero nag-surrender sa iya pakaisa nga tanod tubtob gin-turn over sa police. — Aksyon Farrah Mae Morano