Mangunguma patay sang gintiro sa Tabug, Alimodian; Manugbaligya utan patay man sang nasalabat sa insidente
ILOILO — Patay ang mangunguma sang natiruhan sa Brgy. Tabug, Alimodian kahapon sang aga, Pebrero 14.
Ginkilala ang biktima kay Rio Agudo, 46-anyos, nga residente sang amo nga barangay, samtang nasalabat naman sa insidente kag napatay si Roquita Dolar, 50-anyos, nagabaligya sang utan nga taga-Bucari, Leon.
Nagaguwa sa imbestigasyon sang police nga una nga nagalakat ang babaye nga si Dolar kag nagasunod si Agudo. Una nga naigo sang bala si Agudo kag ginapatihan sang pulis nga naglapos ini kag nag-igo pa gid kay Dolar.
Pilas sa wala nga guya ang naagum ni Agudo kag may pilas man sa liug nga ginalantaw lapos sang igo sang bala.
Igo naman sa likod, malapit sa spinal column ang naagum ni Dolar.
Dead-on-the-spot si Agudo samtang dead-on-arrival sa ospital si Dolar.
MAY PAMAHOG SA KABUHI
May pamahog sa kabuhi si Agudo antes siya ginpatay sa base sa pagpangusisa sang Alimodian police sa bata kag pamilya sang biktima.
Pagpanguma ang nagapanguna nga trabaho ni Agudo pero naga-side line siya sa pagbaligya sang kasapatan sa Brgy. Bucari, Leon. Nagalapitanay lang ang Tabug, Alimodian kag Bucari, Leon.
“Suno sa bata niya nga babaye, personal ni, previously mga 2023, ‘may record ni sa barangay nga na-areglo na man. Amo to nga gin-umpisahan kuno nga daw may threat sa kabuhi niya asta subong.’ Amo man na ang ginasugid niya sa asawa kag kabataan niya,” suno kay Police Captain Marion Asparo, officer-in-charge sang Alimodian Municipal Police Station.
Wala na gindetalye ni Asparo ang kaundan sa “record sa barangay” ni Agudo.
Magluwas diri, wala man ginadula sang Alimodian police ang anggulo nga may kahilabtanan sa negosyo ang pagpatay sa biktima.
Base sa initial nga imbestigasyon sang police kag personnel sang Scene of Crime Operatives (SOCO), indi magnubo sa duha ang mga suspetsado tungod may bala sang 45 caliber kag 9mm nga pusil sa ginluntaran sang insidente.
“NASALABAT ANG MANUGBALIGYA UTAN”
“Kun basehan mo ang igu sang aton nga biktima nga lalaki ara sa guya (sa left) panaog sa iya nga liog. So, may posibilidad nga nag-through and through [ang bala] kag amo to ang nag-igu sa likod sang babaye,” suno kay Asparo.
Dulhugon ang porsyon sang banas nga gina-usoy sang duha ka mga biktima sang natabo ang krimen. Suno kay Asparo, una nga nagalakat si Dolar, nagasunod si Agudo, samtang sa likod nila (mataas nga porsyon) ang mga suspetsado.
Nagapabilin nga at large ang mga suspetsado. — Aksyon Maria Kayla Tingzon
