Mga posters ginpakabit sa wala pa mahuman nga multi-purpose building sa Brgy. Concepcion, City Proper; Barangay Kapitan Madonna Martin nag-ako nga siya ang nagpabutang

Nasab-it sa guwa sang wala pa mahuman nga multi-purpose building sa Brgy. Concepcion, City Proper ang posters nga nagapanawagan kun san-o tapuson ang proyekto.

Kahapon sang aga sang nakit-an sang mga residente ang mga nakasab-it nga posters nga may nakasulat nga “Cong Jam ano na?” “Kap, ti ano na ni?” “Cong Jam ginkwaan mo kami kalipayan. Diin na kami mabasket?” “Cong Jam sang 2021 pa ni. San-o tapuson ang gym?”

Ginatumod sa posters kanday Iloilo City Lone District Congresswoman Julienne Baronda kag Punong Barangay Madonna Martin.

Gin-ako ni Punong Barangay Madonna Martin nga siya ang sa likod sang mga posters nga ginpangsab-it sa guwa sang wala pa mahuman nga multi-purpose building sa ila barangay.

Sa interview sang Aksyon Radyo Iloilo, ginpahayag ni Martin nga hungod niya nga ginpa-obra kag ginpasab-it ang mga posters bilang panawagan nga hatagan sang igtalupangod ang proyekto.

Ginhimo niya ini tungod madamo na sang reklamo nga nabaton kag nabatian halin sa mga residente may kaangtanan sa wala pa mahuman nga multi-purpose building sa ila barangay.

Ginpabutyag ni Martin nga nadulaan sang lugar para sa paghampang sang basketball ang kabataan sa ila barangay tungod wala pa matapos nga proyekto.

Ginpahayag sang kapitan nga si Congresswoman Baronda ang nagpatigayon sang proyekto.

Suno sa Iloilo City District Engineering Office sang Department of Public Works and Highways, 2021 sang ginsuguran ang proyekto kag sang Abril 2024 nahuman ang Phase 1 sini.

Pero wala pa mapadayon ang Phase 2 tungod pending ang issuance sang building permit halin sa Office of the Building Official (OBO). — Aksyon Paula Elambayo