2 ka Filipino, 1 ka foreigner ginakabig nga persons of interest sa pagpatay sa Slovakian nga babaye nasapwan sa abandonado nga chapel sa Boracay

AKLAN— May persons of interest na ang police sa nagpatay sa 23-anyos nga Slovakian nga nasapwan sa sulod sang abandonado nga chapel sa Brgy Balabag, Malay sa Boracay, Island.

Ginkilala ang napatay kay Michaela Mickova.

Suno kay Police Lieutenant Mar Joseph Ravelo, hepe sang Malay Police Station, duha tubtob tatlo ang ginakabig nila nga persons of interest.

Ginpabutyag niya nga ginkabig sila nga persons of interest tungod may mga testigo nga nakatudlo nga nakaupod sila sa separado nga aktibidad sang biktima.

Lunsay lalaki nga Filipino kag foreigner ang ginakabig nila persons of interest.

Sa pagpangusisa sang police, Marso 1 nag-abot sa Boracay island ang biktima nga nagtambong sa kasal sang iya nga abyan sang Marso 8. Nagatiner sa hotel sa Station 2 sakop sang Brgy. Balabag amg biktima.

Masami nga isahanon nga naglakat ang biktima sa mga lugar nga wala ginakadtuan sang mga turista, suno sa police.

Marso 10 sang indi na ma-contact sang iya nga abyan ang biktima tubtob gin-report nga missing sang Marso 11.

Pasado las-3 sa hapon sang Marso 12 sang may nag-report sa police nga concerned citizen nga may nakita siya nga bangkay sa sulod sang chapel.

Sang ginpadulongan sang police, nasapwan ang bangkay sang babaye nga yara na sa advanced state of decomposition kag wala na sang pang-idalum nga panapton.

Gina-imbestigaran subong sang kapulisan kon ano ang natabo sa biktima.

Una na nga ginpbutyag sang Police Regional Office 6 nga magapabilin nga safe kag secure nga destinasyon ang Boracay Island nga may nagabantay nga kapulisan.– Aksyon Farrah Mae Morano