ILOILO CITY – Lima ang arestado kag duha ang nakapalagyo sa drug buy bust operation sa ginakabig sang police nga drug den sa Brgy. Benedicto, Jaro la-1:15 sang Sabado sang kaagahon.
Ini ang ginkumpirmar ni PCPT Lester Oliveros, OIC sang Jaro Police Station.
Ginkilala ang mga nadakpan kanday Rodel S. Bayoneta nga amay sang main subject kag tag-iya sang balay; Edmund A. Bedia sang Brgy. Bagongbong, Barotac Nuevo; Joebert J. Amalong sang Brgy. Desamparados, Jaro; kag Christian E. Magallanes kag Ronald S. Palomar sang Brgy. Benedicto, Jaro.
Samtang nakapalagyo ang subject sang operasyon nga si Rodel M. Bayoneta nga gin-identify sang mga pulis nga naga-maintain sang drug den, kag ang iya manghod nga si Romel.
Suno kay Oliveros, sa kilid sang suba nahamtang ang balay nanday Bayoneta gani nakapalagyo ang mag-utod kag tungod madulom, wala na malagas sang kapulisan.
Ginkumpirmar man niya nga lunsay may record sa kapulisan ang mga nadakpan magluwas lang kay Palomar.
Isa ka bulan suno kay Oliveros ang monitoring sa nasambit nga drug den.
Na-recover ang anum (6) tanan ka plastic sachets sang suspected shabu nga nagabalor P204,000.
Natalana ipaidalum sa drug test ang mga nadakpan, suno kay Oliveros.
Gintinguhaan sang Aksyon Radyo Iloilo nga makuhaan sang statement ang mga nadakpan apang nagpamalibad sila nga magpa-interview.
