ILOILO — Patay ang duha ka lalaki sang gintiro sa Brgy. Poblacion Ilaya, Lambunao sang weekend.
Ginkilala ang mga biktima kanday Ramil Opiane, 51-anyos, kag Joven Besite, 41-anyos, lunsay mga residente sang amo man nga lugar.
Suspek si Gil Casiple, 63-anyos.
Suno kay Police Major Joegen Suegay, hepe sang Lambunao Police Station, naga-inom sa tiyangge ang suspetsado sang ginkadtuan ni Opiane.
May nagluntad nga pagbinaisay sa tunga nanday Opiane kag Casiple rason nga nagtambag si Besite.
Nagpauli sa ila balay ang suspek kag pagbalik may dala nga 45 caliber pistol kag ginpangtiro ang mga biktima.
Napilasan sa tuo nga parte sang dughan si Opiane, samtang napilasan sa wala nga parte sang dughan kag wala nga kilid si Besite.
Na-recover ang pusil nga gingamit sa krimen, samtang preso ang suspek sa Lambunao Police Station.
