Patay ang lalaki nga nagabantay sang tiyangge sang gintiro sa Zone 3, Barangay San Juan, Molo kagab-i, Enero 20.

Ginkilala ang biktima kay Alex Macabebe nga residente sang nasambit nga lugar.

Suno kay Boboy, nga bata sang biktima, pito ka lupok ang iya nabatian tubtob nakita nga nagahuray-ad na sa sulod sang tiyangge ang iya amay.

Yara sa sulod sang tiyangge ang biktima sang gintiro siya sang suspek.

Sa initial nga impormasyon, may pilas sa baba ang biktima. Ginhingagaw pa siya dala sa ospital pero wala natabangan, base sa kumpirmasyon ni Alfredo nga manghod sang biktima.

Nakasakay sa motorsiklo, suno kay Boboy ang mga suspek.

Binulan pa lang sang nakaguwa sa presuhan si Macabebe suno kay Barangay Kagawad Edgar Moises sang na-interview sang Aksyon Radyo Iloilo.

May kaangtanan sa illegal nga druga ang kaso sang biktima.

Sa pagpangusisa ni Kagawad Moises, nagpanaug lang sa motorsiklo ang suspek kag nagpalapit sa tiyangge tubtob gintiro ang biktima. Gilayon nga nagpalagyo ang mga suspek.

Nagapadayon pa ang imbestigasyon sang police sa motibo sang krimen.