ILOILO— Masobra P3 million nga balor sang suspected shabu ang na-recover sang pulis sa drug buy bust operation sa Purok Proper-B Brgy. Lumbia, Estancia kahapon, Abril 22.
Nadakpan si alyas Neme, 38-anyos sang Brgy. Lumbia, Estancia; iya upod sa balay nga si alyas Christy, 22-anyos sang Muelle Loney, City Proper; kag alyas Leo, 28-anyos sang Brgy. Bulaqueña, Estancia.
Na-aresto man ang bata ni Neme nga si alyas Kevin, 15-anyos; kag alyas Aira, 17-anyos.
Nakumpiskar ang 447.08 grams sang suspected shabu nga may estimated Standard Drug Price (SDP) nga P3,040,144.
Suno kay Police Lieutenant Adrian Baligod, hepe sang Estancia Municipal Police Station, ginahimo na nila nga drug den ang balay ni alyas Neme.
Ang operasyon, suno kay Baligod ang konektado pa sa ila nagligad nga mga operasyon. Kanday Neme ang naga-supply sang illegal drugs sa mga nadakpan sang pulis sa drug buy bust operation.
Gina-follow up na sang pulis ang source sang illegal drugs sang ila nagkaladakpan. — Aksyon Farrah Mae Morano
