6 ka crew members sang MV Hirman na-rescue makaligad na-stranded sang duha ka bulan sa Loboc Port sa Lapuz

ILOILO CITY — Na-rescue ang anum ka Filipino crew members nga na-stranded sang duha ka bulan sa MV Hirman Star sa Loboc Port, Lapuz.

Trese (13) ang crew nga sakay sang barko kon sa diin pito ang Indian nationals.

Sa impormasyon sang Aksyon Radyo Iloilo, mapabilin sa barko ang pito ka Indian national tungod may asikasuhon pa sa immigration.

Matandaan nga nagpadala sang sulat ang mga Filipino crew members kay Iloilo City Lone District Representative Congresswoman Julienne “Jamjam” Baronda nga nagapangayo sang bulig tungod na-stranded sang duha ka bulan.

Personal nga ginkadtuan ni Congresswoman Baronda ang barko upod ang taga-Department of Migrant Workers (DMW) kag Overseas Workers Welfare Administration (OWWA).

Nakabaton sang financial assistance ang anum ka Filipino crew members.

Naghatag sang P50,000 ang DMW kag dugang nga P50,000 halin sa OWWA.– Aksyon Paula Elambayo