ILOILO — Duha na ka bulan nga stranded ang anum ka mga Filipino seafarers sa barko nga MV Hirman Star sa port sa Loboc, Lapuz.
Base sa sulat nga ginpadala sang mga seafarers kay Iloilo City Lone District Congresswoman Julienne Baronda nga nagapangayo sang assistance, nag-abot ang barko sang Agosto 2024 halin sa Vietnam nga may karga nga sinako sang bugas kag Abril 3 sila nangin kabahin sang crew sa idalum sang Erika Crew Manning Services.
May 13 tanan ka crew members ang barko — anum ang Pilipino kag pito ang Indian.
Sa anum ka mga Filipino crew members, tatlo ang residente sang Iloilo –taga-Tigbauan, San Joaquin kag Estancia. Halin naman sa Batangas, Cebu kag Cavite ang tatlo pa.
Sang nagsakay ang mga Pilipino, nadiskubrehan nila nga wala sa insakto nga kondisyon ang barko tungod ginakay-o ang radar, gyro compass, steering wheel kag duha ka mga generators.
Sa tion nga makay-o natalana kuntani sila nga magpadulong sa Singapore.
Pero sang gin-inspect sang Philippine Coast Guard (PCG) ang barko, natukiban nga expired ang vessel trading certificate kag delayed ang sweldo sang mga Indian crew members sang tatlo ka bulan gani wala ginpalakat.
Abril 12 sang nagbalik ang PCG agud i-release ang barko sa detention.
Mayo 7 naman sang nag-release sang clearance ang Philippine Ports Authority (PPA) nga puwede na makabiyahe ang barko pagkasunod nga adlaw.
Pero sang gin-test sang mga crew ang engine kag iban pa nga mga equipment sang barko, nagapabilin nga may problema.
Sa tunga sang mga equipment nga may pagkinahanglan nga kay-uhon, ginpilit sang tag-iya sang barko nga dayunon ang ila lakat pero wala nagpasugot ang vessel master tungod sa kabalaka sa seguridad sang ila pagbiyahe.
Magluwas sini, ginpahayag man sang mga crew nga na-delay ang ila sweldo para sa Abril makaligad ginpromisahan sila nga makuha ang bilog nga sweldo sa tion nga makalakat na ang barko.
Nabutang sa sulat sang mga crew nga katapusan sila nga nakabaton sang rasyon sang tubig kag pagkaon sang Mayo 12.
Sa pagpangusisa naman sang Aksyon Radyo Iloilo news team sa port police, humalin pa sang nagligad nga tuig naka-angkorahe ang barko antes pa ma-privatize ang Visayan Container Terminal sa Loboc, Lapuz. — Aksyon Maria Kayla Tingzon
