7 pilason sang natumba ang service vehicle sa Namocon, Tigbauan

ILOILO — Natumba sa higad sang dalan ang service vehicle sang Brgy. Namocon, Tigbauan pasado las-6 kagab-i, Oktubre 11.

Suno kay Punong Barangay Rewill Gabucay sang Brgy. Namocon, Tigbauan, siya ang driver sang service vehicle kag halin sila sa Brgy. Buyu-an tungod ginhapit ang mga dancers sang ila tribu nga nagapasakop para sa Saludan Festival.

Pakadto kuntani sa Brgy. Barroc ang service vehicle tungod may practice para sa opening salvo.

Ginpahayag sang kapitan nga nag-malfunction ang manibela sang salakyan gani wala niya ma-kontrol kag nakabunggo sa poste sang streetlights kag natumba.

Suno kay Police Captain Alfred Mansoy, hepe sang Tigbauan Municipal Police Station, gindala sa ospital ang pito ka mga dancers nga pasahero tungod sa naagum nga gasgas sa nagkalain-lain nga parte sang ila lawas.

Estable na ang kondisyon sang mga napilasan sa ospital, suno sa police.– Aksyon Paula Elambayo