ILOILO CITY – Ginabantayan sang City Disaster Risk Reduction and Management Office (CDRRMO) ang 72 ka mga barangay sa Iloilo City nga posible bahaon kun magtupa ang mamunog nga ulan.
Suno kay Mr. Darwin Papa, head sang Operations Division sang CDRRMO, natumod ang mga barangay paagi sa Climate and Disaster Risk Assessment sang 2020. Ginabaha suno sa iya ang 72 ka mga barangays kun magmunog ang pag-ulan, kag kun may magsulod nga bagyo.
Nagapanguna diri ang Sto. Niño Sur, Sto. Niño Norte, Calaparan, Sooc, Yulo Drive sa Arevalo; Tanza Baybay, Ortiz, Tanza Esperanza sa City Proper; Lanit, Camalig, Dungon B, Tabuc Suba, Balabago, Calubihan, Cubay, San Isidro, Tagbak sa Jaro; Baldoza, Ingore, Ticud sa La Paz; Bo. Obrero, Mansaya, Don Esteban sa Lapuz; Bakhaw, Navais, Airport, Bolilao, Pali Benedicto sa Mandurriao; kag Calumpang, Boulevard, San Juan, West Habog-Habog, kag West Timawa sa Molo.
Lakip sa mga criteria sang CDRRMO sa pagtumod sa mga barangay ang ila geographic location sa diin nahamtang ang mga ini sa low lying areas, kag malapit sa mga major river system pareho sang suba.
ANO ANG PREPARASYON SA LA NIÑA PHENOMENON?
Suno kay Papa, gin-activate na ang mga member response cluster sang CDRRMO paagi sa pagpreparar sang ila mga equipment nga magamit gilayon kun kinahanglanon.
Ginrekomendar sang CDRRMO sa Department of Public Works and Highways (DPWH) 6 kag DPWH- City District Engineering Office nga buksan ang mga major water ways agud mangin masulhay ang pag-ilig sang tubig.
Ginahaylo man ang mga nagkalain-lain nga barangay sa siyudad nga tinluan na ang mga kanal kag mga drainage system agud may maagyan ang tubig pananglitan magmunog ang ulan.
Una na nga gin-report sang PAGASA nga posible ma-experiensiyahan ang epekto sang La Niña sa Hulyo-Setyembre subong nga tuig.
