ILOILO — Walo ka mga indibidwal ang nadakpan sa illegal nga pabulang sa Brgy. Borongan, San Dionisio kahapon, Hulyo 12.
Ginkilala ang mga nagkaladakpan kanday alyas Reynold, 37-anyos; Roberto, 60-anyos; Erwin, 44-anyos; Loreto, 67-anyos; John, 47-anyos; kag Leonardo, 76-anyos lunsay residente sang amo nga barangay. Samtang dakup man kanday Lope, 21-anyos kag Ariel, 29-anyos sang Brgy. Agdaliran.
Suno kay Police Captain Edward Villanis, hepe sang San Dionisio Municipal Police Station, yara sa 20 tubtob 30 ang yara sang lugar sang ila ginrespondehan pero ang walo lang ang ila nadakpan tungod nakapalagyo.
Na-recover sa lugar ang lima ka inug-bulang nga mga manok sa diin apat ang patay na kag P400 nga bet money.
Preso sa San Dionisio MPS ang walo kag natalana pasakaan sang kaso nga paglapas sa Presidential Decree 1602 ukon Illegal Gambling Law buwas, Hulyo 14. — Aksyon Maria Kayla Tingzon
