Jaro, Iloilo City: Inmate sa BJMP-Ungka, nagpalagyo sa tuyo nga magbalos sa pulis nga gintudlo sini rason sang iya pagkapreso!

By: Aine Grace Bravo

Nagtinguha nga makapalagyo sa Bureau of Jail Management and Penology (BJMP) sa Ungka, Jaro ang preso nga may kaso angut sa illegal drugs agud makabalos sa pulis nga gintudlo sini may atraso sa iya.

Isa ini sa mga rason nga ginsugid ni Dexter Lee, 26-anyos sang San Juan, Molo matapos liwat nga nadakpan sang Domingo. Suno kay Senior Jail Officer 2 Leo Laserna, imbestigador sang BJMP 6, ginrason man ni Lee ang iya pagkahidlaw sa iya bata kag live-in partner nga madugay na nga wala nakabisita sa presuhan.

Ginadumtan suno sa iya ni Lee nga patyon ang kasilingan nga si PO3 Jonathan Maestrecampo assigned sa Molo PNP nga gin-alegar rason sang iya pagka-preso. Nakaluwas si Maestrecampo matapos ginsaruso sang mga ido si Lee.

Sa imbestigasyon nanday SJO2 Laserna, nakapalagyo si Lee paagi sa pagsaka sa tower kag paglukso sa pader sang presuhan. Gina-imbestigaran na ang jail warden kag pito ka mga jail guards bangud sa natabu.