Iloilo City: Transport Caravan sang mga depasahero kag pribado nga salakyan, nangin madinalag-on!

By: Jocelyn Gelloagan-Maque

Nag-simpatiya ang mga tag-iya sang pribado nga salakyan sa caravan sang mga transport group sa siudad.

Suno kay Iloilo City Alliance of Drivers Association (ICADA) president Nick Dalisay, indi lang depasahero nga salakyan ang apektado sa implementasyon sang Joint Administrative Order (JAO) sang DOTC, LTO kag LTFRB kundi lakip man ang mga pribado nga salakyan.

Gintumod ni Dalisay ang provision sang JAO nga ginadakop ang driver nga depektibo ang accesories sang salakyan kag nagabayad sang tuman ka taas nga penalidad.

Nagsugod alas 9 kaina sang aga ang caravan sa Mohon Terminal sa Arevalo padulong sa Molo, City Proper, La Paz tubtub sa Barangay Tagbak, Jaro kag pabalik sa LTO 6 sa diin naghiwat sang press conference.

Magluwas sa transport group sa siudad, nag-upod man sa caravan ang probinsya sang Iloilo, Capiz, Aklan, Antique kag Negros Occidental.