Lalaki nga naglumpat sa creek matapos nabugtawan sang ginikanan sang iya ginapangaluyagan nga nagalingling sa ila balay, nasapwan nga patay na

Leganes, Iloilo–Nakita na ang 26-anyos nga lalaki nga naglumpat sa creek sa Tacas, Jaro sang Biernes sang gab-i.

Naga-utaw utaw sa baybayon sang Sitio Panuso-on, Barangay Nabitasan, Leganes ang bangkay ni Odienan Celiz sang Escalante, Negros Occidental kahapon. Nakita sang mga mangingisda ang bangkay ni Celiz nga may pilas sa ulo, nagasuksok sang orange nga t-shirt kag wala na sang underwear.

Si Celiz ang ginatudlo ni Tacas Punong Barangay Joseph Porral nga naglumpat sa creek nga naka-underwear lang matapos nabugtawan sang ginikanan sang iya ginapangaluyagan nga nagalingling sa ila balay. (Aine Grace Bravo)