Update: Salakyan nga gin-alegar gingamit sa pagpalagyo sang suspek nga nagtiro patay kay Rogelio Amil sa motel sa Lapaz, natultulan sang mga pulis

Iloilo City–Na-locate na sang kapulisan ang salakyan nga gin-alegar gingamit sa pagpalagyo sang mga suspek nga nagtiro patay kay Rogelio Amil Jr, 32-anyos sang Ticud, Lapaz sa compound sang The Q Drive-in Motel.

Natukiban sang mga pulis nga gindala sang ginatudlo gunman nga si Hamza Pechon Kayani ang Chevrolet Colorado pick-up nga itom sa Card’a Auto Repair Shop sa Barangay Sambag, Jaro. Gin-ako sang tag-iya sang shop nga si Mr. Ricardo Losada nga may transaksyon sila sang tag-iya sang salakyan sang Sabado, Setyembre 12 nga ipakay-o sini ang salakyan sa Lunes, Setyembre 14. Apang nakibot siya nga Domingo pa lang sang gab-e, nag-abot na ang salakyan kag wala pa sang plate number.

Isa sa mga helpers ni Losada ang ginbilinan sang salakyan bangud wala siya sa shop sang amo nga petsa. Positibo nga ginkilala ni Losada si Kayani nga tag-iya sang salakyan paagi sa mga litrato nga ginpakita sa iya sang Lapaz police. Una nga nagpakay-o suno sa iya sang salakyan si Kayani sang nakabunggo ang pick-up duha bulan na ang nakaligad.

Antes sini, na-interview sang Aksyon Radyo si Kayani sa diin gin-ako sini nga nabilin sa syudad ang isa niya ka salakyan kag luyag niya mahibaluan kon ngaa nagamit ini sa krimen. Ginpanghiwala man sini ang mga akusasyon kag ginpanindugan nga indi niya kilala ang biktima kag kaupod sini nga babaye nga ginkilala kay Lovely Mae Provido.  (Aine Grace Bravo)