Daan nga hiligut-anon, ginatudlo motibo sa pagtiro sa 27-anyos nga Lalaki sa Concepcion, City Proper

Iloilo City — (UPDATE)  Daan nga hiligut-anon ang ginasunod nga anggulo sang police sa pagtiro kay Rey Ann Fernandez, 27-anyos sng Barangay Concepcion, City Proper.

Ginpahayag ni Senior Inspector Mark Cordero sang Waterfront Detachment nga nagbakal sang sigarilyo ang biktima pasado alas 4 kaina sang kaagahon sa Zamora-Concepcion sang ginsunod sng suspek nga naka-bonnet kag gintiro sa dughan, abaga kag kamot.

Ginpahayag nga may gintayaan sang pusil si Fernandez sang Oktubre 31 nga ginreklamo ni Von Basil Guillergan sang Monica City Proper sa Iloilo City Police Office (ICPO).

Narecover ang tatlo ka empty shells sang 9mm pistol kag isa ka bala nga wala naglupok.

Ginsaylo na sa Western Visayas Medical Center si Fernandez halin sa Iloilo Saint Paul’s Hospital. (JoMaque)