Update: Kapid sang ginpatay nga HR supervisor sang Taytay sa Kauswagan, nakibot sa pagtudlo sa iya nga suspek sa krimen!

Iloilo — Nakibot si Alma Sorongon, kapid sang ginpatay nga si Taytay sa Kauswagan HR supervisor Leah Sorongon-Pasamonte, sang may naguwa nga istorya nga nagatudlo sa iya nga suspek sa krimen.

Ginpabutyag ni Alma nga ginapangita man sini ang hustisya sa pagpatay sa iya kapid nga nasapwan nga patay na kag nagapos sa puno sang kahoy sa Taslan, Dumarao, Capiz sang biernes santo.

Suno kay Alma, nabatian sini ang istorya nga ginatudlo siya nga isa sa mga suspetsado.

Marso 23 sang kaagahon ukon isa ka adlaw matapos ginreport nga missing si Pasamonte, nagkadto suno kay Alma sa ila balay ang mga pulis pero wala nila nabatian ang pagpanuktok bangud malayo ang gate.

Nag-coordinate man si Alma sa mga pulis agud makakadto siya sa pag-autopsy sa bangkay sang iya kapid pero ginpahayag nga ginlaygayan ini nga indi na lang magkadto para sa iya safety. (JoMaque)