Kaso sang Provincial Government sang Guimaras Vs. Iloilo City Government kag Double Dragon Properties Corp. parte sa GIFT, Posible nga Ipasaka sa Masunod nga Semana

Iloilo City — Posible makapasaka na sang kaso sa masunod nga semana ang Guimaras Provincial Government kontra sa Iloilo City Government kag Double Dragon Properties Corporation parte sa Guimaras-Iloilo Ferry Terminal.

Ginkonfirmar ini ni Board Member kag Vice Governor-elect John Edward Gando matapos nagpasar sang resolution sa ila session kahapon paagi sa unanimous nga boto nga nagahatag sang otoridad kay Governor Samuel Gumarin nga magpasaka sang kaso.

Posible suno kay Gando nga madalasa ang iban pa nga ahensya sang gobyerno pareho sang Maritime Industry Authority (MARINA) kag Philippine Coast Guard kon lainon ang ruta sang mga pumpboats nga nagabiyahe Ortiz-Jordan kag Parola-Buenavista.

Indi kuntani maglab-ut sa kasuhay ang isyu suno kay Gando kon gin-istorya lang ang mga guimarasnon antes nagsulod sa agreement ang Iloilo City.

Lakip lang sa mga probisyon sang Joint Venture Agreement sang syudad kag Double Dragon sa GIFT nga gina-angal sang Guimaras Provincial Government ang 11 pesos nga terminal fee kag pagsirado sang Ortiz kag Parola wharves kon mag-operate na ang terminal. (JoMaque)