(Update) Bureau of Fire Protection sa Sta Barbara, Gina-imbestigaran kun bala Hungod ukon Indi ang Pagsunog sa Unit sang Melvin taxi

Iloilo — Nagkuha sang mga ebidensya ang Bureau of Fire Protection sang Sta Barbara agud matumod kun hungod ukon indi ang pagsunog sa unit sang Melvin taxi kagab-i sa Cabugao Norte.

Suno kay Senior Fire Officer 1 Arturo Adolfo, luyag nila mahibaluan kun bala may flammable materials nga gingamit sa pagsunog sa salakyan ukon may short circuit nga amo ang gintunaan sang pag-ibwal sang kalayo.

Ginpahayag ni Adolfo nga 90% na nga nasunog ang Melvin taxi sang nag-abot sila sa lugar gani mopping operation na lang ang ila ginhimo.

Ginbanta sa 700 mil pesos ang balor sang kahalitan sa sunog.

Ginpahayag nga lima pa lang ka adlaw nga ginbakal ang Isuzu Crosswind nga unit sang Melvin taxi nga ginmaneho ni Ferdinand Josal, 52 anyos sang Boulevard Molo. (JoMaque)